تحقيق: هانى عبد المسيح كل الأديان السماوية تحث على الزواج المبكر للشباب "للعفة" ولكن تأخر سن الزواج بين الشباب والفتيات على السواء أصبح ظاهرة وزادت معها معدلات الانحراف. فى بعض الأوساط الشباب تبادلوا الاتهامات مع جيل الآباء.. فما هى الأسباب وكيف يمكن القضاء على تلك الظاهرة من وجهة نظر الآباء والأبناء.. هذا ما رصدناه فى التحقيق التالى.. فى البداية يقول محب وجدى زكى (مهندس).. تأخر سن الزواج و الابتعاد عن التقاليد والأصول التى تربى عليها كل مصرى وإتباع تقاليد غربية الآن لا تتماشى مع مجتمعنا الشرقى ترجع لأسباب اقتصادية وارتفاع نسبة البطالة وزيادة تكاليف الزواج ومبالغة أولياء الأمور فى طلبات الزواج وعلينا إيجاد الحلول لتلك المشاكل أولا وبالتبعية سينخفض سن الزواج. أما الحاج إبراهيم على علام " بالمعاش" فقال .. زمان الأب والأم كانوا يبحثون عن العروسة للولد و دايما تكون إما بنت الجيران أو بنت العم وكان الموضوع يتم فى حدود الجيرة والأهل وكانت الشبكة 55 جنيه والمهر 20 جنيه وغرفة النوم 50 جنيه وكمان السكن فى بيت العيلة لكن دلوقتى مفيش شغل والأسعار مولعة وتكاليف ليلة الزفاف لوحدها كبيرة جدا والعفش و الذى منه على فكرة وجود البنت لسن كبيرة من غير زواج قنبلة موقوتة زمنية والشباب غلبان. عمرو محمد حسن ( طالب).. الشاب منا هيخلص دراسة وهو عنده 23 سنة وبعدها الخدمة العسكرية يبقى 25 سنة يبقى طبيعى أن يتزوج فى سن 32أو 35 ده لو لحق يعمل حاجة والأسعار كل يوم بتزيد. أحمد السيد ( مهندس كمبيوتر) قال.. مبالغة أولياء أمور البنات هى السبب جبنا مثلا شبكة 10000 جنيه وفرح 6000 غير الشقة والعفش وعلى ما نعمل كل ده يكون سنك كام ويبقى الفارق بين البنت والولد لا يقل عن 10 سنين. أحمد محمد رمضان (29 سنة مدير مشتريات ).. زمان كنا نسمع أن الواحد يخلص دراسة على سن 18 سنة والبنت 18 سنة أو مش متعلمة أصلا لكن دلوقتى على ما نخلص جامعة أو معهد يبقى السن 23 سنة وزمان الأهل كانوا بيساعدوا فى تكاليف الزواج لكن الآن لازم تعتمد على نفسك والأسعار مولعة جدا وكمان عدد البنات زاد بالنسبة لعدد الشباب وكمان بعض الشباب معندهمش وعى يعنى إيه زواج وبيت وأولاد وعايز يبقى لوحده من غير مسئولية. عصام مصباح (شيف-35سنة).. الحالة المادية هى السبب بالنسبة للطرفين الولد والبنت والأسعار غالية والدخل ثابت ورأى بعض الشباب إن الزواج تقييد للحرية وإتباع بعض الفتيات تقاليد لا تتوافق مع مجتمعنا الشرقى. كيرلس شريف (د. صيدلى).. بالنسبة لنا نحن كأقباط هو اختيار واحد ولابد أن يكون بدقة متناهية ولابد أن يكون هناك توافق فى السلوك والتفكير والثقافة وطبعا الحالة الاجتماعية والمادية لهما عامل كبير فى اتمام الزيجة المقدسة. ماجد وجدى ( مهندس).. الشاب هيبدأ يفكر يتجوز أو يخطب بعد سن 25 لما يخلص دراسة وجيش ولو قدر فى سن 30 يكون جاهز للجواز يدور على بنت الحلال واليومين دول نسبة كبيرة من البنات لها اهتمامات بالموضة و المكياج واهتمامات أخرى غير البيت والأولاد والمطبخ. مينا رؤوف (مهندس).. مطالبة الأهل بالأصل والفصل للطرف الآخر وتدخل بعض الأهل فى الاختيار مما يجعل الموضوع فاشل. ك.أ (22 سنة خريجة كلية تربية).. الأسباب الاقتصادية وعدم رغبة الشباب فى تحمل المسئولية والبطالة وتمسك الأهل بضرورة وجود الشاب فى وظيفة حكومية يعنى إن فاتك الميرى .... مريس (موظفة 28 سنة ) معظم الشباب مش بتاع جواز والباقى بيتسلوا وكمان بتوع بابا وماما وبصراحة مفيش شغل والأسعار عالية جدا "تعددت الأسباب والزواج واحد". ولنا كلمة والآن ما رأيك أنت عزيزى القارئ فى كيفية حل المشكلة ؟!
