مروة وإيمان وألاء قاعدين فى البيت للطبيخ والفضائيات والنت
زيزو وكريم طالعين سفارى.. وحسام بيدور على شغل
وفاء مسافرة إيطاليا.. وأمين راجع النمسا.. وحسن غاوى لعب
شباب كتير قالوا كلام تانى.. وبنات كشفت أسرار
تحقيق
أمجد محمد ـ بسمة الجمال
نسمة ممدوح ـ عمرو أحمد
أصحبنا فى فصل الصيف.. وكعادة الإسماعيلية يأتى إليها المصطافون ليتمتعوا بجمالها وشواطئها ولكن ماذا عن أبنائها وخاصة من الشباب والبنات؟ كيف يقضى هؤلاء الصيف؟ وماذا عن وقت فراغهم؟ هذا وأكثر سوف نتعرف عليه فى سطور التحقيق التالى..
فى الإسكندرية
فى البداية تقول شيماء فاروق.. سوف أذهب لقضاء معظم أيام الصيف فى أحد المحافظات مثل الإسكندرية أو مرسى مطروح ثم أعود إلى الإسماعيلية لبداية البحث عن وظيفة وذلك بعد التخرج.
وتقول سمر مدبولى.. سوف أذهب إلى الإسكندرية أو أحد شواطئ فايد لقضاء أيام الصيف الحارة هناك والتمتع بأماكن نشاهدها من العام إلى العام.
البيت أحسن
وتختلف معهم مروة الغريب فتقول.. معظم أيام السنة نتمتع بالإسماعيلية وشواطئها أما هذه الفترة من السنة أفضل البقاء بالمنزل نظرا لازدحام الشوارع بالمصطافين الوافدين علينا ومشاهدة التليفزيون أو النت أفضل.
وتتفق معها إيمان محمود حيث أنها تفضل البقاء بالمنزل أيضا فى هذه الفترة من السنة نظرا لحرارة الجو الشديدة والازدحام بالشوارع.
كذلك تتفق معهم خلود احمد عيسى فهى تفضل البقاء فى المنزل معظم الوقت نظرا لحرارة الجو.
وأيضا مى السيد تفضل البقاء فى المنزل نظرا لما تصفه بالاختناق من حرارة الجو من جهة وازدحام الشوارع من جهة أخرى.
أما محمد سيد فهو يقول.. عندى شغل ولا يوجد لدى أجازات لذلك لا أستطيع التمتع بالسفر إلى أى مكان أو حتى التمتع بجو الصيف فى الإسماعيلية.
سارة محمود تقول أنها طالبة فى الثانوية العامة لذلك فهى لا تتمتع بالصيف أو المصايف لأن الدروس الخصوصية تلاحقها والمذاكرة حتى وإن كانت فى فترة أجازة الصيف.
سما محمود تقول أنها تقضى الصيف داخل الإسماعيلية ولكن فى الشاليه الخاص بها وذلك بعد انتهائها من الامتحانات.
أما محمد السيد فيرى أنه لا فرق بين الصيف وأى وقت فى السنة فهو لا يرتب للصيف برنامجا خاصا به ولكن يقضيه كبقية الأيام.
سفارى
أمينة السيد.. ها أقضيها كورسات تنمية بشرية ورحلات.
زيزو إسماعيل.. أنا ها أقضيها سفارى وها أروح أسبوع فى كل بلد.
الساحل الشمالى
أحمد أحمد.. صحابى هييجو من دبى وها نروح الساحل الشمالى واحتمال نقضى الصيف كله هناك.
كريم متولى.. ها أسافر وألف مصر.. أجازة الترحال.. وخروجات وفسح.
محمد كابو.. خلصت امتحانات وسأحضر فرح ابن خالتى وأروح إسكندرية.
سحر.. ها أروح إسكندرية وأغير جو.
سارة على.. أشتغل وأخرج وكده يعنى.
عبد الله صالح.. فى الأرض بتاعتنا.
رؤية حسن.. أول حاجة ها أعملها هاروح أصيف وبعدين لما أرجع أدور على شغل عشان أنا خلصت خلاص.
ندى أحمد.. أدور على دورات تدريبية للخارج وأساسى ها أصيف بس مش ها أطول عشان النادى عشان ورايا مباريات مهمة جدا وها أحاول استمتع كتير بالصيف ده.
فادى موسى.. إن شاء الله ها أفتتح مشروع جديد ويكون مفاجأة جامدة جدا.
آلاء محمد.. ها أقضيه فى البيت كالعادة والخروج كل فين وفين وأتعلم الطبيخ.
نرمين مجدى.. ها أقضيه نوم فى البيت وخلاص.
أمين وصفى.. أنا ها أرجع النمسا تانى عشان النادى.
حسام السيد.. ها أشوف أى شغل وأشتغل.
وفاء سالم.. ها أقضى الصيف عند أختى فى إيطاليا.
أحمد عابدين.. آخرى بلاى ستيشن وسهر وخروجات.
أسماء على.. ها نعمل مشروع أرانب.
دعاء على.. ها أقضيها الصيف كله نوم.
حسام سعيد.. طبعا الأجازة كلها ها اقضيها لعب.
حمدى أحمد.. أنا ها أسافر إسكندرية.
إسلام حبيب مصطفى.. السنة دى بالنسبة ليه صعب أقضى الصيف لأنى هبقى مشغول فى تدريب تبع الكلية بس لغاية يوم لما أسافر ممكن أروح رأس البر أو العريش لأخويا والمشكلة أن رمضان السنة دى داخل فى الصيف فأنا بالنسبة ليه أجازة الصيف دى مضروبة خالص لأنى ها أقضى شهرى 7 تدريب و8 هيبقى رمضان والعيد وبعدين يومين والدراسة.
أحمد السيد عبد الغنى.. أجازة الصيف دا ها أقضيها زى ممتعودين كل سنة نقضى أسبوعين فى إسكندرية عند قريبنا كزيارة وتصييف فى نفس الوقت والصراحة بيكونوا أجمل أسبوعين فى فصل الصيف.
إسراء فوزى السيد.. الحقيقة احنا متعودين نسافر كل سنة بس السنة دى مش هنسافر عشان أهلى مسافرين العمرة وبعدها نجهز لخطوبة أخويا وبعدها رمضان.
نادر البلتاجى.. أنا بسافر على طول شرم الشيخ بس السنة دى صعب أسافر مصايف عشان الجيش بس لو جتلى الفرصة هاخدلى أسبوع مع أصحابى نصيف فى أى حته.
أحمد مصطفى التابعى.. أنا بقضى الصيف مع زملائى فى العمل ومبهتمش إنى أسافر بس لو جت فرصة سفر مع أصحابى هسافر أنا دايما بحب أروح إسكندرية بس إجازة الصيف دى هاخد فيها كورسات تنمية بشرية وicdl عشان أجهز نفسى لسوق العمل.
سماح دياب إبراهيم.. أنا الصيف دا مش هسافر زى مكنا متعودين كل سنة أن إحنا نقضى أسبوعين كده فى أى حته لكن الصيف دا بأحضر لخطوبتى ومفيش وقت نسافر خصوصا إن رمضان جاى السنة دى فى أجازة الصيف وبعده العيد والأجازة كده خلصت ونرجع للدراسة تانى.
سيد محمد إبراهيم.. أغلبية وقتى فى الصيف تدريب والصيف دا طالع سفرية تبع الشغل منها شغل ومنها مصيف والصيف عموما بأقضيه زى ماتيجى يا إما سهر أنا وأحد أصحابى طول الليل على البحر يا إما بننزل وسط البلد نتفسح.
إسراء عبد الرؤوف.. مبدئيا بيكون فى أسبوعين على الأقل مصيف مع العائلة فى إسكندرية أو مرسى مطروح أما السنة دى هنطلع مصيف تبع شغل أخويا هنروح دهب سفارى.
أحمد حسين مصطفى.. أنا شايف إن أجازة الصيف السنة دى مش هتكون فيها سفر كتير عشان دخول رمضان والناس اللى طالعين عمرة رجب ويرجعوا يجهزوا لرمضان فأنا شايف أن أغلبية الناس السنة دى هتصيف فى بيتها ومع الأصحاب.
شيماء أحمد محمد.. إحنا بنقضى الصيف فى إسماعيلية مابنسافرش أو مبنهتمش إن إحنا نسافر دايما لأن قريبنا هما اللى بييجوا يصيفوا عندنا ونفسحهم ونتفسح معاهم.
نعمة عزت خلف.. إحنا كل سنة بنسافر مصيف تبع شغل والدى وبنستنى أختى تنزل أجازة من السعودية ونأخدها ونطلع رحلة مع الأسرة ونقضى لنا أسبوعين بره الإسماعيلية وفى الغالبية السنة دى هنقضى الصيف فى إسكندرية.
شيماء جمال عبد الناصر.. أنا ها أقضى أجازة الصيف خروجات مع أصحابى وأغلبية الوقت أمام التليفزيون والنت وبنقضى أسبوعين عند أختى فى الغردقة.
أحمد ناجى.. ها أروح شرم الشيخ أسبوعين مع عائلتى وبعدين لما أرجع أحضر عشان أحتفل بعيد ميلادى مع صحابى ولازم أروح كل صيف إسكندرية وبعدين أرجع عشان عندى تدريب صيفى تبع الكلية لغاية شهر 9 وها أكمل صيفى خروجات مع أصحابى.
محمد صابر مصطفى.. إحنا كل سنة نسافر أسبوعين للعريش مع أصحابنا والسنة دى ها نسافر نروح فيلا فى العجمى مع قريبنا ونقضى لنا أسبوع فى العجمى ونرجع نستعد بقى لرمضان.
هانى رمضان.. أنا متعود كل صيف أقضى أسبوعين أنا وأصحابى فى العريش عند صاحبنا هناك فى شاليه وأرجع أصيف هنا مع قريبى وصحابى وبهتم فى أجازة الصيف إنى أشارك فى أى نشاطات أو آخد كورسات وأغلبية وقتى على النت فى أجازة الصيف.
هايدى محمود عبد الله.. أنا ها أقضى الصيف السنة دى فى شرم الشيخ مع ولاد خالتى وقريبنا وأرجع أكمله مع أصحابى خروجات وفسح ورحلات وأغلبية وقتى فى الصيف على النت وبالليل أنزل مع أصحابى وسط البلد أو كافيهات.
محمد محمود عبد الله.. أنا فى الصيف دا بصيف وأشتغل فى نفس الوقت فأنا شغلى فى شرم الشيخ والغردقة ومرسى علم فالصيف بينقضى لوحده بس أكيد بحب أقضيه مع أهلى فى الإسماعيلية.
محمد عصام الدمرداش.. أنا السنة دى مش ها أصيف وأصلا الصيف السنة دى مضروب عند كل الناس عشان دخول رمضان فى الصيف ورمضان وقته ضيق أنا عن نفسى مش هسافر فى حته السنة دى.
مى مصطفى حسين.. إحنا لازم كل صيف نسافر فى أى حته مالناش مكان معين على حسب الظروف والأغلبية بتبقى رحلات تبع شغل والدى ونصيف هنا برده وفى أجازة الصيف دائما بشترك فى نادى ألعب تنس وبأخد كورسات فى الأجازة.
